Gəncə Şəhər İcra Hakimiyyətinin başçısı Elmar Vəliyev təbii fəlakətdən ziyan çəkmiş sakinlərin yanında olmuşdur
Təbii fəlakətin törətdiyi fəsadların qısa vaxt ərzində aradan qaldırılması məqsədilə Gəncə Şəhər İcra Hakimiyyətinin başçısı Elmar Vəliyev bütün gün ərzində sakinlərin yanında olur, onların arzu və istəkləri ilə maraqlanaraq lazımi köməkliklərin göstərilməsi üçün tapşırıqlar verir.
Növbəti görüşü Tağı Arani və İsaq Cəfərov küçələrindəki çoxmərtəbəli binaların sakinləri ilə keçirən icra başçısı burada jurnalistlərə müsahibə vermişdir. Elmar Vəliyev demişdir ki, güclü qasırğa 500-ə yaxın yaşayış binasına, fərdi yaşayış evlərinə və ictimai-sosial obyektlərə ziyan vurmuşdur. Fövqəladə Hallar Nazirliyi və Gəncə Şəhər İcra Hakimiyyətinin nümayəndələrindən ibarət komissiya dəymiş zərərin qısa vaxt ərzində qeydə alınması üçün işləri daha da sürətləndirmişdir. Artıq çoxmərtəbəli binaların dam örtüklərinin bərpası işlərinə başlanılmışdır. 61 ədəd çoxmərtəbəli binanın dam örtüyünün dəyişdirilməsi yaxın vaxtlarda başa çatdırılacaqdır. Mahrasa bağı, Gülüstan, Yeni Gəncə, Şıxzamanlı qəsəbələrində, eləcə də şəhərin mərkəzində olan fərdi və ictimai binalara külli miqdarda ziyan dəymişdir. 24 fərdi evdə bərpa işləri başa çatmışdır. Dağıntıların tezliklə aradan qaldırılması üçün əlavə qüvvələr də cəlb edilmişdir. Fövqəladə Hallar Nazirliyi nümayəndələrinin dağıntı barədə tərtib etdikləri aktlar alınan kimi dərhal təmir işlərinə başlanılır. Dəyən ziyanın məbləği barədə konkret fikir söyləmək çətindir. Çünki vətəndaşların evləri ilə yanaşı təhsil, səhiyyə və mədəniyyət obyektlərinə də çoxlu sayda ziyan dəyib. 100-lərlə işıq dirəyi aşmış, 100 kilometrlərlə elektrik naqili sıradan çıxmışdır. Bir sözlə, komissiya hələ işləyir. Vətəndaşlara dəymiş ziyanı müəyyənləşdirmək üçün şəhər İcra Hakimiyyətində «Qaynar xətt» yaradılmışdır. Təbii fəlakətin ölkə başçısının nəzarətində olduğunu diqqətə çatdıran Elmar Vəliyev onu da əlavə etmişdir ki, təbii fəlakətdən ziyan çəkən bir nəfər də kənarda qalmayacaqdır. Bir sözlə, yaxın vaxtlarda Gəncədə baş vermiş dağıntılar tamamilə aradan qaldırılacaqdır.
