Gəncə Şəhər İcra Hakimiyyətinin başçısı yeni müavinlərini ictimaiyyətə təqdim edib
Gəncə Şəhər İcra Hakimiyyətinin başçısı Elmar Vəliyev təqdimat mərasimində bildirib ki, bir neçə ildir humanitar məsələlər üzrə müavin vəzifəsində çalışan Nizami Hacıyev şəhər İcra Hakimiyyəti başçısının şəhər təsərrüfatı məsələləri üzrə müavin vəzifəsinə təyin olunub.
Xatırladaq ki, Gəncə şəhər İcra Hakimiyyəti başçısının şəhər təsərrüfatı məsələləri üzrə müavini vəzifəsi təxminən iki ilə yaxın təyinatsız idi.
İcra başçısı ictimai-siyasi və humanitar məsələlər üzrə yeni müavinini də ictimaiyyətə təqdim edib. Bu vəzifəyə rəhbərlik Gəncə Dövlət Universitetinin Musiqi kafedrasının müdiri Sevda Qurbanəliyevaya həvalə olunub.
Qeyd edək ki, sənətşünaslıq üzrə elmlər doktoru, professor Sevda Qurbanəliyeva Azərbaycan Dövlət Konservatoriyasını bitirib. Əmək fəaliyyətinə Qənbər Hüseynli adına Gəncə Musiqi Texnikumunda müəllim kimi başlayıb. Gəncə Dövlət Universitetində musiqi fənləri kafedrasının müdiri vəzifəsində çalışıb.
