Gəncədə tibb işçiləri öz peşə bayramlarını işdə qazandıqları uğurlarla qeyd ediblər
Bayram tədbirinin iştirakçıları əvvəlcə ümummilli lider Heydər Əliyevin abidəsini ziyarət etmiş, önünə gül dəstələri düzmüşlər.
Tədbiri giriş sözü ilə Gəncə Şəhər İcra Hakimiyyəti başçısının müavini Sevda Qurbanəliyeva açmış və əlamətdar gün münasibətilə səhiyyə işçilərini təbrik etmişdir.
Şəhər Səhiyyə idarəsinin rəisi Mehman Rzayevin son illər Azərbaycan səhiyyəsində, o cümlədən Gəncədə görülən işlər və bu sahədə qazanılan uğurları əks etdirən məruzəsi dinlənilmişdir. Məruzəçi qeyd etmişdir ki, ölkəmizdə yeni tibb ocaqlarının yaradılması və yenidən qurulması, müasir tibbi texnologiyaların tətbiqi əhaliyə səhiyyə xidmətinin səviyyəsinin yüksəldilməsinə böyük imkanlar yaratmışdır. Bu inkişaf respublikanın ikinci böyük şəhəri olan Gəncədə də nəzərə çarpacaq dərəcədədir. Gəncə şəhəri üzrə 35 tibb müəssisəsi fəaliyyət göstərir ki, həmin tibb ocaqlarında 853 həkim, 3200 tibb işçisi əhaliyə tibbi xidmət göstərir. Səhiyyə ocaqlarının maddi-texniki bazası möhkəmləndirilmiş, müasir tibbi avadanlıqların alınması isə xidmətin keyfiyyətini xeyli artırmışdır. Bölgədə ən böyük tibb ocaqları olan Abbas Səhhət adına və infeksion xəstəxanalarında, 6 saylı poliklinikada əsaslı təmir işləri aparılaraq yenidən qurulmuşdur. Bundan başqa region üçün əhəmiyyətli rol oynayan perinatal və rayonlararası hemodializ mərkəzlərinin, eləcə də onkoloji xəstəxanada şüa müalicə bölməsinin, kompyuter tomoqraf simulyator aparatının istifadəyə verilməsi səhiyyə və sağlamlıq göstəricilərinin yaxşılaşmasına zəmin yaratmışdır.
Tədbirdə çıxış edən Gəncə Şəhər İcra Hakimiyyətinin başçısı Elmar Vəliyev şəhər sakinlərinə, xüsusən uşaqlara yüksək səviyyəli tibbi xidmətin göstərilməsinin vacibliyindən danışmış, ehtiyac duyulan səhiyyə ocaqlarının əsaslı və cari təmiri, həmçinin lazımi tibb avadanlıqların alınması üçün tapşırıq və göstərişlərini vermişdir.
YAP sıralarına yeni qəbul olunan tibb işçilərinə üzvlük vəsiqələri təqdim olunduqdan sonra işdə fərqlənən bir qrup tibb işçisinə fəxri fərman, təşəkkürnamə və qiymətli hədiyyələr verilmişdir.
