Gəncə şəhər İcra Hakimiyyətinin başçısı təbii fəlakətdən ziyan görən vətəndaşların qəbulunu keçirib.
Gəncə şəhər İcra Hakimiyyətinin başçısı Elmar Vəliyev bildirib ki, təbii fəlakət zamanı ziyan dəymiş vətəndaşlardan 500 nəfərdən çoxu artıq qəbul edilib və şikayətləri əsasında komissiya üzvləri tərəfindən evlərə baxış keçirilib.
İcra başçısı bildirib ki, ümumilikdə 500 fərdi ev, 300 bina və 56 dövlət müəssisəsinə ziyan dəyib. 27 avtomobil fəlakət zamanı ciddi zədələnib. Elmar Vəliyev avtomobil sahiblərinə dəyən ziyanın sığorta şirkətləri tərəfindən qarşılanması məqsədi ilə lazımi sənədlərin toplanılaraq aidiyyatı üzrə verilməsinə köməklik göstərilməsi üçün də komissiya üzvlərinə tapşırıqlar verib.
Güclü qasırğa və leysan nəticəsində maddi və mənəvi zərər görən 100 nəfərə yaxın vətəndaşın iştirak etdiyi yığıncaqda vətəndaşların əksəriyyəti təbii fəlakət nəticəsində dam örtüklərinin uçması, evlərə su dolması, evlərinin və hasarlarının üzərinə ağac aşması ilə bağlı icra başçısına müraciət ediblər.
Elmar Vəliyev vətandaşları dinlədikdən sonra yaranmış vəziyyətlə əlaqədar yaradılan xüsusi komissiyalara vəziyyətlə yerində tanış olmaları və mövcud durumun aktlaşdırılmasını bir daha tapşırıb. Elmar Vəliyev şəhərin daxili imkanları hesabına evlərin bərpası istiqamətində işlərə başlanması barədə göstəriş də verib.
Qəbulda iştirak edən bir qrup vətəndaş isə təbii fəlakətin fəasadlarının aradan qaldırılması üçün qısa vaxt ərzində göstərilən diqqətə görə ölkə başçısına, həmçinin şəhər rəhbərliyinə minnətdarlıq bildiriblər.
Xatırladaq ki, təbii fəlakət nəticəsində dam örtüklərinin uçması, evlərə su dolması, evlərinin və hasarlarının üzərinə ağac aşması ilə bağlı vətəndaşlara dəyən ziyanın qarşılanması istiqamətində işlər davam edir.
Dam örtüklərinin dəyişdirilməsi ilə yanaşı 70-ə yaxın aşan elektrik dirəkləri və 100 kilometrlərlə sırdana çıxan elektrik naqilləri də tam bərpa edilib. Kommunikasiya və 27 nöqtədə qaz xətlərində yaranmış nasazlıqlar da aradan qaldırılıb.
Qeyd edək ki, təbii fəlakət zamanı 1000-dən artıq fərdi yaşayış evini su basıb, 800-ə yaxın fərdi və ümumi yaşayış evinin dam örtükləri dağılıb, çox sayda işıq dirəkləri, dayanacaqlar, zibil qutuları, oturacaqlar, reklam löhvələri yararsız hala düşüb. Şəhər təsərrüfatına çox ciddi ziyan dəyib.
