Gəncə şəhərində keçirilən Dövlət Bayrağı günü iştirakçılara xoş anlar yaşatdı

Minlərlə şəhər sakini, uşaqdan tutmuş böyüyədək hamının üzündən sevinc oxunurdu. Əllərində üçrəngli Azərbaycan bayrağı tutmuş insanlar yaşadıqları müstəqil Azərbaycan Respublikası ilə fəxr etdiklərini qürurla söyləyirdilər. Ətrafa yayılan şən mahnılar bu təntənəni daha da canlandırırdı.

Çox çəkmədi ki, meydanda əsgərlər göründülər. Çiyinləri üstündə üçrəngli Azərbaycan bayrağını tutmuş əsgərlər marş sədaları altında mətin addımlarla tədbir iştirakçılarının qarşısından keçdilər. Sonra şəhər məktəbli¬lə¬ri¬nin nümayişi başladı.
Mərasim iştirakçıları Dövlət Himnini canlı olaraq səsləndirdilər. Sonra Gəncə Şəhər İcra Hakimiyyətinin başçısı Elmar Vəliyev çıxış edərək tədbir iştirakçılarını əlamətdar gün münasibətilə təbrik etdi və müqəddəs üçrəngli bayrağımızın dövlət müstəqilliyimizin, ölkənin ərazi bütövlüyünün və toxunulmazlığının simvolu olduğunu bildirdi. Azərbaycançılıq, vətənpərvərlik ideyalarına sadiq qalmağın, bayrağımızın şərəfini hər yerdə qorumağın hər bir azərbaycanlının müqəddəs borcu olduğunu qeyd etdi. Müstəqillik qazandıqdan sonra əldə olunan uğurlardan danışan Elmar Vəliyev bu inkişafı Gəncənin timsalında faktlarla diqqətə çatdırdı.
Rəsmi hissədən sonra şəhərin musiqi kollektivləri vətənpərvərlik mövzusunda maraqlı proqramla çıxış etdilər.