Gəncədə “Vətəndaş iştirakçılığı: qanunvericilik və onun tətbiqi məsələləri” mövzusunda konfrans keçirilib

Gəncədə Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası, ABŞ və Azərbaycan hökumətinin birgə maliyyələşdirdiyi Sosial İqtisadi Fəaliyyət layihəsi (SEDA) tərəfindən “Vətəndaş iştirakçılığı: qanunvericilik və onun tətbiqi məsələləri” mövzusunda konfrans keçirilib.

Gəncə-Qazax iqtisadi rayonunu əhatə edən 9 şəhər və rayondan 80 nəfərə yaxın icra hakimiyyəti orqanları nümayəndələrinin, bələdiyyə sədrlərinin və yerli hökumət təşkilatları rəhbərlərinin, həmçinin beynəlxalq ekspertlərin iştirakı ilə keçirilən konfransdan əvvəl iştirakçılar ümummilli lider Heydər Əliyevin abidəsini ziyarət edərək abidə önünə gül dəstələri qoymuşlar.
RAMADA plaza otelində öz işinə başlayan konfransı Gəncə şəhər İcra Hakimiyyətinin başçısı Elmar Vəliyev açaraq qonaqları salamlayıb. Bildirib ki, Gəncə şəhərində belə bir əhəmiyyətli və mühüm tədbirin keçirilməsi çox əlamətdar hadisədir. Azərbaycan Respublikasının Prezidenti cənab İlham Əliyev Qeyri-Hökumət Təşkilatlarının fəaliyyətinə, inkişafına daim diqqət və qayğı göstərir. Vətəndaş cəmiyyəti institutları dövlətlərin iqtisadi və sosial həyatında əhəmiyyətli rol oynayır və çoxsaylı sosial, iqtisadi problemlərin həllində vacib amil kimi çıxış edir. İcra başçısı Elmar Vəliyev bu tədbiri regionda fəaliyyət göstərən Qeyri-Hökumət Təşkilatlarına yüksək qayğı olaraq dəyərləndirib və konfransın işinə uğurlar arzulayıb.
Konfransda Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, Milli Məclisin üzvü Azay Quliyev tədbirin əhəmiyyətini qeyd edərək “İctimai iştirakçılıq haqqında” Qanunun qəbulunu və onun prezident İlham Əliyev tərəfindən icraya yönəldilməsini Azərbaycan vətəndaşlarının dövlət idarəçiliyində və qərarların qəbulunda fəal iştirakının təmin edilməsi baxımından çox mühüm bir hadisə olduğunu diqqətə çatdırıb. Azərbaycan hökumətinin bu addımını indiyə qədər ölkədə həyata keçirilən hüquqi islahatların, vətəndaş cəmiyyəti quruculuğu və demokratikləşmə prosesinin davamı və dövlət-vətəndaş münasibətlərinin inkişa¬fında növbəti, keyfiyyətcə yeni mərhələnin başlanğıcı kimi dəyərləndirib.
Sonra USAİD-in Vaşinqtondakı baş ofisinin Cənubi Qafqaz Ölkələri üzrə məsul nümayəndəsi Hezer Vord çıxış edərək bildirdi ki, ABŞ hökuməti Azərbaycan hökumətinin vətəndaş cəmiyyəti təşkilatlarının və özəl sektor nümayəndələrinin ölkənin sosial və iqtisadi inkişafının təkmilləşdirilməsi naminə öz fikirlərini töhfə etməsi üçün geniş və davamlı imkanlar yaratması sahəsində səylərini yüksək dəyərləndirir.
Qeyri-Kommersiya Hüququ üzrə Beynəlxalq Mərkəzinin vitse-prezidenti (İCNL) xanım Nataliya Burjali, Şərq-Qərb İdarəetmə İnstitutunun layihə rəhbəri Tim Mədiqan və başqaları öz çıxışlarında Azərbaycan Respublikası Prezidentinin “İctimai iştirakçılıq haqqında” qanununun tətbiqi ilə bağlı 2013-cü il noyabrın 22-də imzaladığı fərmandan irəli gələn məsələləri regionun dövlət, yerli özünüidarəetmə orqanları və vətəndaş cəmiyyəti institutlarının nümayəndələri ilə müzakirə edilməsini yüksək qiymətləndir-mişlər.
Günortadan sonra Qeyri-Kommersiya Hüququ üzrə Beynəlxalq Mərkəzin Bakı Ofisinin rəhbəri Məhəmməd Quluzadənin, Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Şurası katibliyinin icraçı direktoru Fərasət Qurbanovun panel iclaslarında ictimai iştirakçılıqla bağlı məsələlər və tətbiqi qaydalar haqqında məruzələri dinlənilmiş və mövzu ətrafında müzakirələr aparılmışdır.