Gəncə şəhər İcra Hakimiyyətinin başçısı Elmar Vəliyev vətəndaşların növbəti qəbulunu keçirilib.

Gəncədə vətəndaşların təklif, müraciət və şikayətlərinə baxılması, onların ehtiyaclarının mümkün şəkildə təmin edilməsi məqsədilə qəbul keçirilən görüşdə 100 nəfərdən çox şəhər sakini iştirak edib.

Şəhərin idarə və müəssisə rəhbərlərinin də qatıldığı qəbulda işsiz vətəndaşların işlə təmin olunması, Qarabağ müharibəsi əlilləri və şəhid ailələrinin mənzil və ya torpaq sahəsi ilə təminatı, qəzalı evlərin təmiri, lift problemi ilə bağlı şikayətlər önə çəkilib.

Həmçinin vətəndaşların qaz, su və elektrik enerjisi ilə bağlı müraciətləri də səsləndirilib. Yığıncaqda səsləndirilən problemlərin bir çoxu yerində həllini tapıb. Elmar Vəliyev səsləndirilən məsələlərlə bağlı aidiyyatı qurumlara ciddi tapşırıqlarını verib. Digər problemlər isə aidiyyatı şəxslər tərəfindən nəzarətə götürülüb.

Görüşdə müraciətlər arasında məşğulluğun təmin edilməsi, sahibkarlıq fəaliyyətinə dəstək, şəhərin Natəvan qəsəbəsində məktəb və uşaq bağçası üçün binaların inşası ilə bağlı da şəhər rəhbərinə qəsəbə sakinləri müraciət ediblər.

Elmar Vəliyev bildirib ki, bu qəbildən olan görüşlərin əsas məqsədi, ölkə başçısının tapşırığına müvafiq olaraq vətəndaşların firavanlığının təminatı, həyat səviyyəsinin yaxşılaşdırılmasına yönəldilib. İcra başçısı şəhər sakinlərinin problemlərinin həlli istiqamətində lazımi addımların hər zaman atılacağına diqqət çəkib.