Gəncədə Azərbaycan Memarlar İttifaqının plenumu keçirilib

Azərbaycan Memarlar İttifaqının təşkilatçılığı Gəncə şəhər İcra Hakimiyyətinin dəstəyi və  ilə  Heydər Əliyev Mərkəzində  memarların  yay plenumu keçirilib. Tədbirdə Gəncə şəhər İcra Hakimiyyətinin başçısı Elmar Vəliyev,Azərbaycan Memarlar İttifaqı İdarə Heyətinin sədri Elbəy Qasımzadə, memarlar, şəhər rəsmiləri iştirak ediblər.

Tədbir iştirakçıları öncə memarların yaradıcılığını əks etdirən sərgiyə baxıblar.
Azərbaycan Memarlar İttifaqı İdarə Heyətinin sədri Elbəy Qasımzadə tədbir iştirakçılarını salamlayaraq, bildirib ki, Azərbaycan Respublikasının Prezidenti cənab İlham Əliyevin rəhbərliyi ilə  son illər ölkəmizdə aparılan genişmiqyaslı quruculuq işləri şəhərsalma və memarlıq sahəsinin inkişafına da dəyərli töhfələr verib. Ölkə paytaxtı Bakının və  regionlarımızın siması tamamılə dəyişərək, yenilənib və müasirləşib. Bunu qədimliyini qorumaqla, daha da gözəlləşən Gəncədə də müşahidə etmək mümkündür. Şəhərə gələnləri heyran qoyan möhtəşəm Heydər Əliyev Mərkəzi, əsil möcüzəni xatırladan  əsrarəngiz park-kompleks bunun bariz nümunəsidir. Elbəy Qasımzadə vurğulayıb ki, 2016-cı ilin  tədbirlər planında İttifaqın  Gəncə Bölməsinin yaradılması  nəzərdə tutulub. Məqsəd  Gəncə şəhəri ilə birlikdə ətraf rayonları da bu bölməyə cəlb etməkdir.
“Memarların fədakar və səmərəli əməyi ilə yaradılmış sənət abidələri xalqımızın mədəni həyatının nadir incilərini təşkil edərək həmişə onun milli şüurunun, estetik zövqünün möhkəmlənməsinə və inkişafına xidmət etmişdir”- ümummilli lider Heydər Əliyevin bu sözlərinin xatırladan Gəncə şəhər İcra Hakimiyyətinin başçısı Elmar Vəliyev çıxışında qeyd edib  ki, Azərbaycan qədim tarixə və  zəngin memarlıq ənənələrinə malikdir.  Xalqımızın milli sərvəti sayılan Gəncənin 4000 illik tarixini qoruyub özündə saxlayan abidələrin böyük bir hissəsi bu gün dünya muzeylərinin ekspozisiyalarında özünəməxsus yer tutur. Metropol (ABŞ) Münhen, Berlin, Hamburq, Luvr, Paris, Moskva, Sankt-Peterburq və digər şəhərlərin  dövlət və şəxsi muzeylərində qədim Gəncənin tarixinə dair nadir və qiymətli eksponatlar saxlanılır. Bu memarlıq abidələri öz əzəməti, orijinal üslubu və yüksək sənətkarlıq keyfiyyətləri ilə mütəxəssisləri indi də heyran edir.
Son illər ölkə rəhbərliyinin diqqət və qayğısı sayəsində qədim Gəncədə geniş quruculuq işləri aparılmış,tarixi abidələr yüksək səviyyədə təmir və bərpa edilib.
Azərbaycan Dövlət Şəhərsalma və Arxitektura Komitəsinin sədr müavini Dövlətxan Dövlətxanov Gəncə şəhərinin Baş planının layihələndirlməsi və inkişafı mövzusunda, AMEA-nın Memarlıq və İncəsənət İnstitutunun baş elmi işçisi Rayihə Əmənzadə Gəncə memarlığı haqqında çıxış edib.
Plenumda  Azərbaycan Memarlar İttifaqı İdarə Heyətinin 6 aylıq hesabatı dinlənilib.
Toplantıda Azərbaycan Memarlar İttifaqına yeni üzvlərin qəbulu və təşkilati məsələlərə baxılıb.
Gəncə şəhər İcra Hakimiyyətinin başçısı Elmar Vəliyev Azərbaycan Memarlar İttifaqının fəxri üzvü seçilib.
Sonda şəhərsalma və memarlıq sahəsində  fərqlənənlərə  “Usta memar”  fəxri adı verilib, bir  qrup memara isə qurumun fəxri fərmanları təqdim olunub.