Gəncədə “31 mart - Azərbaycanlıların Soyqırımı Günü xalqımızın qan yaddaşıdır” mövzusunda dəyirmi masa keçirilib
Şəhər ziyalılarının iştirakı ilə keçirilən tədbirdə ermənilər tərəfindən müxtəlif dövrlərdə soyqırıma məruz qalmış azərbaycanlıların xatirəsi bir dəqiqəlik sükutla yad edilib. Gəncə Şəhər İcra Hakimiyyəti başçısının birinci müavini Elnur Rzayev azərbaycanlılara qarşı XIX əsrin əvvəllərindən başlayan və bu gün də davam etdirilən soyqırımı dəhşətlərini tutarlı faktlarla dəyirmi masa iştirakçılarının diqqətinə çatdırıb.
Elnur Rzayev çıxışında qeyd edib ki, bu məkrli siyasət nəticəsində 1905-1907, 1918-1920, 1948-1953 və 1988-1993-cü illərdə erməni millətçiləri Azərbaycan torpaqlarında xalqımıza qarşı kütləvi qırğınlar törədərək yaşayış məntəqələrini, tarixi və mədəniyyət abidələrini, məscidləri, məktəbləri, səhiyyə ocaqlarını dağıdıblar. Xüsusilə 1918-ci ilin martında erməni daşnakları Bakıda, Gəncədə, Şamaxıda, Qubada və ölkənin digər guşələrində misli görünməmiş qanlı qırğınlar törədiblər.
1918-ci il martın 30-u gecə saatlarında Bakıda başlanan kütləvi qırğınlar 20 minə yaxın günahsız insanın, o cümlədən çoxlu sayda qoca, qadın və uşağın qətli ilə nəticələnib. Martın 30-dan aprelin 2-dək davam edən kütləvi qırğınlarda Stepan Şaumyanın rəhbərlik etdiyi erməni bolşevik dəstələri Bakıda minlərlə insanı qətlə yetirib, müsəlman ziyarətgahlarını yandırıb, Bakı əhalisinin 400 milyon manatlıq əmlakını müsadirə edib. Kütləvi qırğınlar zamanı şəhərin ən möhtəşəm məscidi sayılan Təzəpir məscidi aramsız top atəşinə tutulub, ermənilər Bakının ən möhtəşəm memarlıq incilərindən olan “İsmailiyyə” binasını yandırıblar.
Ötən əsrin 80-ci illərində SSRİ-nin rəhbər dairələrinin təhriki və yardımı ilə 200 minə yaxın azərbaycanlı Ermənistandan amansızcasına qovulmuşdur. Dağlıq Qarabağ və onun ətrafındakı 7 rayon erməni hərbi birləşmələri tərəfindən işğal olunmuşdur.
Dəyirmi masada Gəncə Dövlət Universitetinin “Ümumi tarix” kafedrasının baş müəllimi Nərgiz Rəsulova “XX əsrin əvvəllərində Azərbaycanda soyqırım hadisələrinin coğrafiyası, miqyası və xronologiyası, Azərbaycan Texnologiya Universitetinin “Fəlsəfə və tarix” kafedrasının baş müəllimi Şahmar Həsənov “Azərbaycanlılara qarşı soyqırım hadisələrinin tarixi siyasi kökləri”, Azərbaycan Dövlət Aqrar Universitetinin “İctimai elmlər və multikulturalizm” kafedrasının müəllimi Elgün Aslanov “31 mart Azərbaycanlıların qan yaddaşıdır” mövzularında məruzələrlə çıxış ediblər.
“Gəncənin Səsi” qəzetinin baş redaktoru Rəfiqə Sadıxova, Gəncə şəhər “Qarabağ əlilləri, veteranları və şəhid ailələri” İctimai Birliyinin sədri Almaz Aşurov, Gəncə Dövlət Universitetinin prorektoru Asif Cavadov, YAP Gəncə şəhər təşkilatının şöbə müdiri Hüseyn Budaqov və başqaları çıxışlarında azərbaycanlılara qarşı zaman-zaman törədilmiş kütləvi qırğınlar barədə danışıb, bununla əlaqədar tarixi faktları diqqətə çatdırıblar. Bildiriblər ki, bu cür tarixi faktlar yalnız ildönümləri zamanı deyil, adi günlərdə də yad edilir. Bu zaman əsas məsuliyyət gənclərin üzərinə düşür, çünki bu günün gənci gələcəkdə ölkənin aparıcı qüvvəsidir.
AMEA-nın Gəncə Regional Bölməsinin akademik katibi Fuad Əliyev mətbuata açıqlamasında vurğulayıb ki, Sovet hakimiyyəti illərində bu tarix yaddaşlardan silinsə də, müstəqillik dövründə tarixi sənədlər əsasında 31 mart 1918-ci ildə Azərbaycan xalqının başına gətirilən faciəvi hadisələrlə bağlı çoxsaylı araşdırmalar aparılıb, kitablar dərc olunub. Yalnız ümummilli lider Heydər Əliyev ikinci dəfə hakimiyyətə gəldikdən sonra bu vəhşiliklərin qarşısı alınıb.1998-ci il martın 26-da prezident Heydər Əliyev “Azərbaycanlıların soyqırımı haqqında” fərman imzalayıb. Həmin gündən 31 Mart tarixi Azərbaycanlıların Soyqırımı günü kimi qeyd olunur. Bu münasibətlə dünyanın müxtəlif ölkələrində tədbirlər, anım mərasimləri, konfranslar keçirilir.
