Gəncə Şəhər İcra Hakimiyyətinin başçısı Niyazi Bayramov kollektivi təbrik edib
Gəncə Şəhər İcra Hakimiyyətində 31 Dekabr – Dünya Azərbaycanlılarının Həmrəyliyi Günü və Yeni il münasibəti ilə toplantı keçirilib. Toplantıda Gəncə Şəhər İcra Hakimiyyətinin başçısı Niyazi Bayramov və Aparatın məsul əməkdaşları iştirak ediblər.
Əvvəlcə Ulu Öndər Heydər Əliyevin, şəhidlərimizin və dekabrın 25-də təyyarə qəzası zamanı həlak olan şəxslərin xatirəsi bir dəqiqəlik sükutla yad olunub.
Niyazi Bayramov çıxışında yola saldığımız 2024-cü ildə Gəncə şəhərində görülən işlərdən danışıb. O qeyd edib ki, Prezident İlham Əliyevin müvafiq Sərəncamı ilə elan olunan “Yaşıl Dünya Naminə Həmrəylik İli” çərçivəsində ölkənin bütün bölgələrində olduğu kimi Gəncədə də bir çox tədbirlər həyata keçirilib. Əsasən, şəhərin ətraf mühitinin sağlamlaşdırılmasına, yaşıllıqların bərpasına və artırılmasına yönəlmiş ağacəkmə aksiyaları təşkil olunub. Şəhər rəhbəri həmçinin, Azərbaycanın dünyada ən nüfuzlu beynəlxalq tədbirlərdən olan COP-29 konfransına ev sahibliyi etdiyini vurğulayaraq, tədbirin ölkəmiz üçün xüsusi əhəmiyyətindən bəhs edib.
Niyazi Bayramov qarşıdan gələn 2025-ci ilin şəhərimiz üçün önəmli illərdən olduğunu da diqqətə çatdırıb. Belə ki Gəncədə III MDB İdman Oyunlarının keçiriləcəyini və Prezident İlham Əliyevin tapşırığı ilə şəhərdə geniş abadlıq-quruculuq işləri aparılacağını qeyd edib.
Çıxışının sonunda Niyazi Bayramov kollektivi 31 Dekabr – Dünya Azərbaycanlılarının Həmrəyliyi Günü və Yeni il münasibəti ilə təbrik edib, onlara cansağlığı və işlərində uğurlar arzulayıb.
Gəncə Şəhər İcra Hakimiyyəti başçısının birinci müavini Səməd Tomuyev, müavinləri Adil Tağıyev və Kamran Məhərrəmov da çıxış edərək, Niyazi Bayramova və kollektivə xoş arzularını çatdırıblar.
Bununla yanaşı, qeyd olunub ki, Gəncə Şəhər İcra Hakimiyyəti başçısı Aparatının Şəhər təsərrüfatı şöbəsinin baş məsləhətçisi Hacıyev Nəsir Fazil oğlu 23 İyun - Dövlət Qulluqçularının Peşə bayramında Azərbaycan Respublikasının Prezidenti İlham Əiyevin müvafiq Sərəncamına əsasən, “Dövlət qulluğunda fərqlənməyə görə” medalı ilə təltif olunub. Niyazi Bayramov sözügedən medalı Nəsir Hacıyevə təqdim edib və əmək fəaliyyətində uğurlar arzulayıb.
Sonda icra hakimiyyətinin kollektivi təbrik və xoş arzulara görə öz təşəkkürünü bildirib.
