Gəncədə 150-ə yaxın vakansiya təqdim edilib
Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi tərəfindən bölgələrdə əmək yarmarkalarının təşkili davam etdirilir. Növbəti əmək yarmarkası Gəncədə keçirilib.
Tədbirdə Gəncə Şəhər İcra Hakimiyyəti başçısının müavini Adil Tağıyev və digər rəsmilər iştirak ediblər.
Gəncə-Daşkəsən Regional Məşğulluq filialı tərəfindən Gəncə şəhərində təşkil edilən aktiv məşğulluq tədbiri Peşə Təhsili üzrə Dövlət Agentliyinin və "ASAN Kadr" karyera mərkəzinin dəstəyi ilə baş tutub. Yarmarkada 28 müəssisə iştirak edib və 145 vakansiya təqdim edilib.
İşəgötürənlər tərəfindən vakansiyalara müraciət edən şəxslərin CV-ləri qəbul edilərək nəzərdən keçirilib, uyğun namizədlər növbəti mərhələyə dəvət olunacaqlar.
Tədbirdə həmçinin işsiz və işaxtaran şəxslərə Agentliyin aktiv məşğulluq istiqamətləri və müraciət qaydaları barədə də məlumat verilib.
