Gəncədə Azərbaycan Dövlət Akademik Rus Dram Teatrının kollektivi tamaşa ilə çıxış edib

S.Vurğun adına Azərbaycan Dövlət Akademik Rus Dram Teatrının kollektivi Gəncə şəhərinə səfər edib. Kollektiv Gəncə Dövlət Dram Teatrının səhnəsində Nizami Gəncəvinin “7 gözəl” poemasının motivləri əsasında hazırlanan eyniadlı tamaşa ilə çıxış edib. Tamaşa Azərbaycan Respublikasının Mədəniyyət Nazirliyinin təşkilatçlığı ilə “Heydər Əliyev İli” çərçivəsində nümayiş olunub.

Nümayişdə Gəncə Şəhər İcra Hakimiyyətinin başçısı Niyazi Bayramov, Azərbaycan Dövlət Akademik Rus Dram Teatrının direktoru Ədalət Hacıyev, Gəncə Dövlət Dram Teatrının direktoru Aqil Bəhramlı, Gəncə Şəhər İcra Hakimiyyəti başçısı Aparatının məsul əməkdaşları, Gəncə Regional Rus İcmasının üzvləri və şəhər sakinləri iştirak ediblər.

Tamaşada rolları Azərbaycan Respublikasının xalq artisti Fuad Osmanov, Azərbaycan Respublikasının əməkdar artistləri Maqsud Məmmədov, Naina İbrahimova və Bella Safina, aktyorlar Murad Məmmədov, Teymur Rəhimov, Olqa Arsentieva, Həcər Ağayeva, Yeganə Hüseyinli, Mariya Dubovitskaya, Fəridə Nesterenko, Milana Sokolenko, İbrahim Çingiz və başqaları ifa ediblər. 2 saat 30 dəqiqə davam edən ikipərdəli tamaşa anşlaqla keçib.

Qeyd edək ki, Nizami Gəncəvinin “Yeddi gözəl” poeması əsasında səhnələşdirilən tamaşanın premyerası 7 dekabr 2012-ci ildə olub. Tamaşanın quruluşcu rejissoru Yonas Vaytkus, quruluşçu rəssamı Arturas Şimonis, bəstəkarı Algirdas Martinaytis, xoreoqrafı Tahir Eynullayevdir. Tamaşa Mədəniyyət Nazirliyinin dəstəyi ilə dövlət sifarişi əsasında hazırlanıb.