Gəncədə cüdo üzrə ustad dərsləri keçilib
Gəncə Şəhər İcra Hakimiyyətinin dəstəyi, Azərbaycan Cüdo Federasiyası (ACF) və Gəncə-Daşkəsən Regional Gənclər və İdman İdarəsinin birgə təşkilatçılığı Gəncədə cüdo üzrə master-klass keçirilib.
Gəncənin mərkəzi meydanında təşkil olunan ustad dərslərini Gəncə Şəhər İcra Hakimiyyətinin başçısı Niyazi Bayramov və digər rəsmilər də izləyiblər.
Master-klass çərçivəsində cüdo üzrə məşqçi-müəllim Samir Bağırov uşaqlara və yeniyetmələrə müxtəlif cüdo fəndlərini nümayiş etdirib. Təcrübəli idmançı cüdonun fəlsəfəsi və əsas texnikaları haqqında məlumat verərək, iştirakçılara bu idman növünün incəliklərini öyrədib. Uşaqlar və gənclər tatamiyə dəvət olunaraq, göstərilən fəndləri öyrənib tətbiq etməyə çalışıblar.
Tədbir zamanı iştirakçılar üçün viktorinalar təşkil olunub, cüdo ilə bağlı suallar verilib və düzgün cavab verən şəxslərə müxtəlif hədiyyələr təqdim edilib.
