Gəncədə Əməkdar məşqçi, "Tərəqqi" medallı, "Şöhrət" ordenli Elçin Zeynalovun 75 illik yubileyi keçirilib
Gəncə Şəhər İcra Hakimiyyətinin dəstəyi, Gəncə-Daşkəsən Regional Təhsil İdarəsinin təşkilatçılığı ilə Gəncə şəhər 10 nömrəli tam orta məktəbdə Əməkdar məşqçi, “Şöhrət” ordenli, "Tərəqqi" medallı Elçin Zeynalovun 75 illik yubileyi münasibətilə tədbir təşkil olunub.
Tədbirdə Gəncə Şəhər İcra Hakimiyyətinin başçısı Niyazi Bayramov, Türkiyənin Gəncədəki Baş konsulu Recep Öztop, Millət vəkili Müşfiq Cəfərov, Gəncə-Daşkəsən Regional Təhsil İdarəsinin müdiri Anar Qədiməliyev, Gəncə Şəhər İcra Hakimiyyəti başçısı Aparatının məsul əməkdaşları, Gəncə Şəhər Gənclər və İdman Baş İdarəsinin rəisi, ADAU-nun rektor əvəzi, şəhərin idman ictimayyətinin nümayəndələri, ziyalılar və təhsil işçiləri iştirak ediblər.
Əvvəlcə Azərbaycan Respublikasının Dövlət Himni səsləndirilib. Daha sonra Ulu Öndər Heydər Əliyevin və şəhidlərin əziz xatirəsi bir dəqiqəlik sükutla yad edilib.
Niyazi Bayramov çıxışında Elçin Zeynalovun şərəfli ömür yolundan bəhs edib. Bildirib ki, Elçin Zeynalov ömrünün böyük hissəsini Gəncə idmanının inkişafına həsr edib. Onun bir çox yetirməsi Dünya, Avropa çempionatlarının, Dünya Kubokunun qalibi və mükafatçılarıdır. Şəhər rəhbəri, Elçin Zeynalovun yetirməsi Toğrul Əsgərovun 2012-ci ildə London Olimpiya Oyunlarının qızıl medalını qazandığını, 2016-cı il Rio de-Janeyro Olimpiya Oyunlarında gümüş medala layiq görüldüyünü diqqətə çatdırıb. Niyazi Bayramov yubilyarın idman sahəsində göstərdiyi xidmətlərinin Azərbaycan Respublikasının Prezidenti cənab İlham Əliyev tərəfindən də yüksək qiymətləndiridiyini bildirib. Çıxışının sonunda Niyazi Bayramov Əməkdar məşqçini 75 illik yubileyi münasibətilə təbrik edib. Bununla yanaşı, şəhər rəhbəri Elçin Zeynalovu Gəncə şəhərində idmanın inkişafına verdiyi misilsiz xidmətlərə görə “Təşəkkürnamə” ilə təltif edib.
Çıxış edən qonaqlar Elçin Zeynalovun həyat və fəaliyyətinə nəzər salıblar, 75 illik yubileyi münasibətilə təbrik edərək, ona cansağlığı, gələcək işlərində uğurlar arzulayıblar.
Tədbirdə istedadlı şagirdlər tərəfindən müxtəlif musiqi və idman nömrələri təqdim olunub.
Sonda Elçin Zeynalov ölkədə idman sahəsinə göstərilən yüksək diqqət və qayğıya görə Prezident İlham Əliyevə və Birinci vitse-prezident Mehriban xanım Əliyevaya təşəkkürünü bildirib. Bununla yanaşı, tədbirin təşkilində əməyi keçənlərə minnətdarlığını ifadə edib.
Qeyd edək ki, Elçin Hidayət oğlu Zeynalov 1 aprel 1948-ci ildə Gəncə şəhərində anadan olub. 1968-ci ildə Kirov adına Bədən Tərbiyəsi İnstitutunun qiyabi şöbəsinə daxil olub. Hazırda sərbəst güləş idman növü üzrə məşqçilik fəaliyyətini davam etdirir və Gəncə şəhər yığma komandasının baş məşqçisi vəzifəsində çalışır. Azərbaycan Respublikasının Prezidenti İlham Əliyevin müvafiq sərəncamları ilə müxtəlif illərdə "Əməkdar bədən tərbiyəsi və idman xadimi" fəxri adına, "Şöhrət" ordeninə, "Azərbaycan Respublikası Prezidentinin fəxri diplomu"na və "Tərəqqi" medalına layiq görülüb.
