Gəncədə fəaliyyət göstərən universitetlərdə “Bilik günü” keçirilib
Bugün Azərbaycan Dövlət Aqrar Universitetində, Gəncə Dövlət Universitetində və Azərbaycan Texnologiya Universitetində “Bilik Günü” münasibətilə tədbir keçirilib.
Keçirilən tədbirlərdə əvvəlcə Azərbaycan Respublikasının dövlət himni səsləndirilib. Daha sonra isə Ulu Öndər Heydər Əliyevin və şəhidlərimizin xatirəsi bir dəqiqəlik sükutla yad edilib.
Azərbaycan Dövlət Aqrar Universitetində keçirilən tədbirdə YAP Gəncə şəhər təşkilatının sədri Bayram Aslanov, Kənd təsərrüfatı nazirinin müavini Elçin Zeynalov, ADAU-nun rektoru Zəfər Qurbanov, Gəncə Şəhər İcra Hakimiyyəti başçısının birinci müavini Səməd Tomuyev, o cümlədən universitetin müəllim və tələbə heyəti iştirak ediblər.
Çıxış edən rəsmilər müəllim və tələbə kollektivini yeni tədris ili münasibətilə təbrik ediblər. Həmçinin, ölkəmizdə aqrar elmin inkişafında Azərbaycan Dövlət Aqrar Universitetinin xüsusi rolu olduğunu diqqətə çatdırıblar.
Gəncə Dövlət Universitetində isə “Bilik günü” isə V tədris binasında təşkil olunub. Tədbirdə Gəncə Dövlət Universitetinin rektoru Yusif Yusibov, Gəncə Şəhər İcra Hakimiyyəti başçısının müavini Adil Tağıyev və universitetin kollektivi iştirak ediblər.
Rəsmilər yeni tədris ilinin başlanması münasibəti ilə universitet əməkdaşlarını və tələbələri təbrik edib, ən xoş arzularını çatdırıblar. Cəmiyyətimiz üçün yüksək ixtisaslı mütəxəssis kimi yetişmələri üçün gənclərə Gəncə Dövlət Universitetində mövcud olan potensialdan faydalanmağı tövsiyə ediblər.
Daha sonra qonaqlar Riyaziyyat-informatika fakültəsinin tələbələri üçün nəzərdə tutulan və əsaslı təmir edilən VI tədris binasına baxış keçiriblər, burada yaradılan şəraitlə tanış olublar.
Analoji olaraq, Azərbaycan Texnologiya Universitetində də yeni tədris ilinin başlaması münasibəti ilə tədbir keçirilib.
Azərbaycan Texnologiya Universitetinin rektoru v.m.i.e dos. Yaşar Ömərov professor-müəllim heyəti və tələbələri yeni dərs ili münasibətilə təbrik edib, onlara uğurlar arzulayıb, universitetdə tələbələr üçün yaradılan imkanlardan danışaraq tövsiyələrini verib.
Sonda hər üç universitetə yüksək bal toplayaraq qəbul olan bir qrup tələbəyə qiymətli hədiyyələr və tələbə biletləri təqdim olunub.
Qeyd edək ki, bu il keçirilən qəbul imtahanlarında Tovuz Hüseynova 645 bal toplayaraq Gəncə Dövlət Universitetini, Zeynəb Əliyeva isə 682 bal toplayaraq Azərbaycan Dövlət Aqrar Universitetini seçiblər.
