Niyazi Bayramov Bakıda ilk dəfə keçirilən “D-8 Yüksəksəviyyəli İqlim və Şəhərsalma Dialoqu”nda iştirak edib
20 oktyabr 2025 | 09:14
Bakıda ilk dəfə “D-8 Yüksəksəviyyəli İqlim və Şəhərsalma Dialoqu” keçirilib. Tədbir iqlim və şəhərsalma fəaliyyətlərini D-8 Onillik Yol Xəritəsi (2020–2030) ilə uyğunlaşdırmaq məqsədi daşıyır.
D-8 Direktoru Punjul Setya Nugrahanın sözlərinə görə, təşkilat üzv ölkələr arasında dayanıqlı iqtisadi inkişaf və əməkdaşlığın gücləndirilməsi üçün mühüm platformadır. Hazırda Yol Xəritəsinin ikinci mərhələsi (2023–2027) icra olunur və bu mərhələ ticarətin, investisiyaların və sektoral əməkdaşlığın genişləndirilməsinə yönəlib. Lakin iqlim dəyişikliyi və sürətli urbanizasiya bu məqsədlərə çatmaqda əsas çağırışlar yaradır.
Şəhərlər həm iqlim dəyişikliyinə səbəb olur, həm də onun təsirlərinə məruz qalır. Buna baxmayaraq, onlar innovasiya və yaşıl həllərin mərkəzi ola bilər. Yaşıl şəhər inkişafı investisiyaları artırır, yeni iş yerləri yaradır və davamlı iqtisadiyyata töhfə verir.
Dialoqda Azərbaycanın ekologiya və təbii sərvətlər nazirinin müavini Umayra Tağıyeva, Dövlət Şəhərsalma və Arxitektura Komitəsinin sədr müavini Dövlətxan Dövlətxanov, D-8 Baş katibi İsiaka İmam, UNESCAP nümayəndəsi Kurt Qarriqan və EBRD-dən Tea Melikadze çıxış ediblər.
Umayra Tağıyeva COP29 zamanı iqlim maliyyəsi sahəsində əldə olunan irəliləyişləri vurğulayıb, Dövlətxan Dövlətxanov davamlı şəhərlərin qurulmasının vacibliyini qeyd edib. XİN nümayəndəsi Elmar Məmmədov isə COP29 çərçivəsində “Davamlı və Sağlam Şəhərlər üçün Çoxtərəfli Fəaliyyət Yolları” Bəyannaməsinin qəbul edildiyini bildirib.
BMT-nin Kurt Qarriqanı regional səviyyədə inklüziv və davamlı şəhər siyasətlərinin önəmini vurğulayıb.
D-8 Həftəsi çərçivəsində D-8 Enerji və İqlim, Media və Nəqliyyat Mükəmməllik Mərkəzlərinin yaradılması, eləcə də təşkilatda islahatlar və yeni əməkdaşlıq istiqamətləri müzakirə olunub.
Azərbaycan 2023-cü ildə D-8 Təşkilatının ilk yeni üzvü olub. Hazırda D-8-ə Misir sədrlik edir, 2026-cı ildən isə bu vəzifəni İndoneziya icra edəcək. İqlim və Şəhərlər üzrə D-8 Dialoqu Azərbaycanın COP29 sədrliyi çərçivəsində təşkil olunub və D-8 ölkələrinin nazir və şəhər rəhbərlərini bir araya gətirib.
Qeyd edək ki, sözügedən tədbirdə Gəncə Şəhər İcra Hakimiyyətinin başçısı Niyazi Bayramov da iştirak edib.
Keçidlər
