Niyazi Bayramov “Daşlara həkk olunan tale: Əcəmi Naxçıvani” filminin çəkiliş meydançasında olub

Gəncə Şəhər İcra Hakimiyyətinin başçısı Niyazi Bayramov Azərbaycan Respublikası Mədəniyyət Nazirliyinin və Azərbaycan Respublikasının Kino Agentliyinin dəstəyi, “Şahdağ Film” MMC-nin istehsalı ilə ərsəyə gələn “Daşlara həkk olunan tale: Əcəmi Naxçıvani” bədii-sənədli filminin çəkiliş meydançasına baş çəkib.

Gəncədə “Nizaminin evi” kimi tanınan kinopavilyonda aparılan çəkiliş prosesini izləyən şəhər rəhbəri filmin yaradıcı heyəti ilə görüşüb, çəkilişlərin gedişi və görülən işlərlə maraqlanıb.

Çəkiliş qrupunun üzvləri filmin ideyası və süjeti, Gəncədə aparılan çəkilişlərin xüsusiyyətləri, eləcə də yaradıcı proses barədə Niyazi Bayramova məlumat veriblər.

Niyazi Bayramov filmin Azərbaycan tarixinin və memarlıq irsinin görkəmli nümayəndələrindən olan Əcəmi Naxçıvaninin həyat və yaradıcılığının geniş auditoriyaya çatdırılması baxımından əhəmiyyətini qeyd edib, yaradıcı kollektivə uğurlar arzulayıb.

Qeyd edək ki, Azərbaycan Respublikası Mədəniyyət Nazirliyinin və Azərbaycan Respublikasının Kino Agentliyinin dəstəyi ilə “Şahdağ Film” MMC tərəfindən istehsal olunan “Daşlara həkk olunan tale: Əcəmi Naxçıvani” bədii-sənədli filminin Gəncə şəhərində çəkilişləri 26–30 iyul 2026-cı il tarixlərində həyata keçirilir.