Niyazi Bayramov dünya çempionları ilə görüşüb

Gəncə Şəhər İcra Hakimiyyətinin başçısı Niyazi Bayramov Pauerliftinq üzrə Dünya çempionu Vüsal Ağalarovla və Peşəkar boksçu, WBS Dünya Çempionu Orxan Abdıyevlə görüş keçirib. Görüşdə Gəncə-Daşkəsən Regional Gənclər və İdman İdarəsinin rəisi vəzifəsini icra edən Elvin Quliyev və Gəncə Şəhər İcra Hakimiyyəti başçısı Aparatının məsul əməkdaşları iştirak ediblər.

Niyazi Bayramov idmançıları salamlayaraq, Prezident İlham Əliyevin və Birinci vitse-prezident Mehriban xanım Əliyevanın idman sahəsinə göstərdikləri diqqət və qayğıdan danışıb. Şəhər rəhbəri, hər iki idmançını ölkəmizi yüksək arenalarda layiqincə təmsil etdikləri və qalibiyyət qazandıqları üçün təbrik edərək, gələcək yarışlarda uğurlar arzulayıb.

İdmançılar öz növbələrində səmimi görüş üçün şəhər rəhbərinə təşəkkürlərini bildirib və yarışlarda qazandıqları qalibiyyətlə bağlı məlumat veriblər. Vüsal Ağalarov və Orxan Abdıyev göstərilən yüksək etimata və diqqətə görə ölkə rəhbərliyinə  minnətdarlıqlarını ifadə ediblər.

Daha sonra hər iki idmançıya Gəncə Şəhər İcra Hakimiyyətinin başçısı Niyazi Bayramov tərəfindən idman sahəsində göstərdikləri yüksək nailiyyətlərə görə “Təşəkkürnamə” təqdim olunub.

Sonda xatirə şəkli çəkdirilib.

Qeyd edək ki, Vüsal Ağalarov Rusiyanın paytaxtı Moskva şəhərində keçirilən  pauerliftinq üzrə dünya çempionatına 110 kq çəki dərəcəsində çıxış edib. O, toplam 890 kq (çöməlmə ilə - 365 kq, uzanaraq - 205 kq, yerdən qaldıraraq - 320 kq) nəticə göstərərək 1-ci yerə layiq görülüb. Orxan Abdıyev isə Türkiyənin İstanbul şəhərində keçirilən peşəkar boks idman növü üzrə rəsmi WBS Dünya Çempionatında iştirak edərək Dünya Çempionu Kəmərinə sahib olub.