Niyazi Bayramov Firdovsi Abdullayevin yas mərasimində iştirak edib

Gəncə Şəhər İcra Hakimiyyətinin başçısı Niyazi Bayramov Laçın rayonunda itkin düşərək həlak olan hərbçi Abdullayev Firdovsi Mais oğlunun ailəsini ziyarət edərək, başsağlığı verib. Şəhər rəhbəri ilə birlikdə yas mərasimində Türkiyənin Gəncədəki Baş konsulluğunun Attaşe köməkçisi Eyyüp Geçer, QMİ-nin Qazılar Şurasının üzvü Hacı Tahir Abbasov, Gəncə Şəhər İcra Hakimiyyəti başçısı Aparatının məsul əməkdaşları, Gəncə şəhər Kəpəz və Nizami bələdiyyələrinin sədrləri Yaşar Abdullayev və Qoşqar Məmmədov iştirak ediblər. 

Rəsmilər yas çadırında olub, həlak olan hərbçinin ailə üzvləri ilə görüşüb, başsağlığı verib, səbr diləyiblər. Niyazi Bayramov keçirilən yas mərasimi ilə əlaqədar olaraq Firdovsi Abdullayevin ailə üzvlərinin istəyinə uyğun aidiyəti üzrə müvafiq tapşırıq və tövsiyələr verib.

Xatırladaq ki, 09.02.2003-cü il təvəllüdlü Abdullayev Firdovsi Mais oğlu və 23.05.2003-cü il təvəllüdlü Məmmədov Fərid Əjdər oğlu 03 mart 2022-ci il il tarixində Laçın rayonunda yüksək dağlıq və çətin relyefli ərazidə hava şəraitinin qəfil dəyişməsi və çovğun səbəbindən istiqaməti itirərək itkin düşüb. Onların nəşinin qalıqları 03 iyul 2024-cü il tarixində Kəlbəcər rayonu, İstisu qəsəbəsindəki Yüzbulaq yaylağının ərazisində tapılıb. Hər iki hərbçinin donaraq vəfat etdiyi məlum olub.